22/07/2020.

O papel dos medios na prevención do suicidio

A Confederación SALUD MENTAL ESPAÑA foi unha das entidades que colaborou na elaboración dun documento, que acaba de publicar o Ministerio de Sanidade, e que recolle unha serie de recomendacións dirixidas aos medios de comunicación para facilitar a abordaxe das informacións relativas á conduta suicida e contribuír, así, á súa prevención.

“Sensibilizar e facilitar información sobre o suicidio nos medios de comunicación, se se fai de forma adecuada e segundo uns principios e recomendacións internacionalmente aceptadas, demostrou ser unha maneira efectiva para a prevención das condutas suicidas”, apuntan desde o Ministerio a través dun comunicado.

Por iso, e para alcanzar este obxectivo, o propio Ministerio promoveu a formación dun grupo de traballo multidisciplinar integrado por representantes da Rede de Colexios Profesionais de Xornalistas, a Federación de Asociacións de Xornalistas de España, a Federación de Sindicatos de Xornalistas, ANIS - Informadores da Saúde, Policía Nacional, a Asociación Internacional de Estudos de Bombeiros, Despois do Suicidio - Asociación de Sobreviventes e a Confederación SALUD MENTAL ESPAÑA.

En canto aos contidos que ofrece este documento, o persoal profesional implicado na súa elaboración traballou durante varios meses na revisión das principais recomendacións achegadas desde o propio Ministerio, elaborando un decálogo e un manual de apoio cun enfoque práctico.

Informar con responsabilidade e afastarse do sensacionalismo, non simplificar unha realidade que é complexa, prestar atención ao tipo de linguaxe empregada e ofrecer o menor número de detalles posible, achegar datos e testemuños fiables, desmentir mitos e falsas crenzas ou ofrecer información de recursos de asistencia e axuda, son algunhas das principais recomendacións que recolle este documento.

Pola súa banda, a Confederación SALUD MENTAL ESPAÑA celebra a publicación desta guía como un paso máis no camiño da sensibilización, neste caso a xornalistas, para acabar co tabú e estigma do suicidio e facilitar que as persoas con ideacións suicidas pidan axuda.

Suicidio, a primeira causa externa de morte en España

Segundo os últimos datos oficiais do Instituto Nacional de Estatística, que corresponden a 2018, nese ano faleceron 3.539 persoas en España por causa de suicidio. A cifra diminuíu un 3,8% respecto ao ano 2017, aínda que continúa sendo a primeira causa de morte externa no noso país.

O suicidio é o maior problema de saúde pública en Europa, cunha taxa de prevalencia de 11.93 por 100.000. A nivel mundial, cada ano suicídanse case un millón de persoas, 800.000 segundo a OMS. Por cada adulto que decide quitarse a vida, posiblemente máis doutros 20 tentárono, e cada suicidio afecta intimamente polo menos a outras seis persoas.

Vía Confederación SALUD MENTAL ESPAÑA.


Compartir contido