15/03/2021.

O CIS estuda a saúde mental dos/as españois/as durante a COVID-19

Un estudo realizado polo Centro de Investigacións Sociolóxicas do 19 ao 25 de febreiro de 2021 presenta unha radiografía xeral sobre o estado da saúde mental das persoas que viven en España durante a realidade vivida pola pandemia da COVID-19. Analiza datos sobre o medo a morrer ou ao contaxio, as emocións de tristeza, problemas de soño, preocupación, cambios de humor, nos hábitos de vida, etc. Ademais, o estudo detalla os datos por ámbito socioeconómico e sociodemográfico, enfocando as consecuencias para a saúde mental das persoas menores, por exemplo.

Melloría ante a gravidade, aínda que alarma ante a evolución da situación. Podería ser o resumo do que pensan as persoas habitantes en España cando estamos a piques de cumprir un ano de pandemia. O 23,4% recoñece que neste tempo de crise sentiu “moito ou bastante medo” a falecer por coronavirus, segundo a enquisa do CIS que, é o positivo, rebaixa a menos da metade a porcentaxe que en novembro sentía o mesmo, e que entón era do 58,4%.

A enquisa sobre saúde mental do Centro de Investigacións Sociolóxicas (CIS) tamén desvela que o 68,6% dos e das habitantes de España padeceu “moito ou bastante medo” ante a posibilidade de morte dun familiar ou ser querido mentres que un 72,3% sentiu esa mesma preocupación ante o medo a contaxiar á súa contorna máis próxima. Na mostraxe reflíctese tamén que un 35,1% chorou pola situación pandémica e respecto ao medo á morte por COVID, a franxa de idade que máis se identifica sitúase entre os 55 e 64 anos, onde se dan o 26,2% das respostas.

Segundo o estudo sobre saúde mental do CIS, o 79% das persoas enquisadas recoñece sentirse “bastante ou moi preocupado/a” pola pandemia e un 28,7% admite que “moitos ou bastantes días” atopouse “mal por ter pouco interese ou pracer en facer cousas”. Un 21,5% considera que está “decaído/a, deprimido/a ou sen esperanza”, outro 21,8% descríbese como “nervioso/a, ansioso/a ou moi alterado/a”, en definitiva, “cos nervios de punta” e un 14,2% asegura sentirse “incapaz de parar ou controlar as preocupacións”.

Pero as consecuencias da COVID van máis aló e o 28 % tivo “pensamentos ou recordos desagradables non desexados sobre o coronavirus”, que no 36% dos casos alteraron “moitas ou bastantes veces” a súa vida social ou as relacións coa familia e os amigos. Ante a COVID, ao 59% das persoas enquisadas preocúpalle que “a pandemia se converta en parte da nosa vida”, unha 53% sospeita que a sociedade xa non volverá ser a mesma e un 33% teme a posibilidade de quedar illado ou illada socialmente.

A preocupación tamén se estende ao traballo. Un 27% teme perder o seu emprego e a un 61% que iso lle ocorra a algún familiar.

Ademais, a sondaxe do CIS desvela que un 51,9% di sentirse “con cansanzo ou con poucas enerxías”, un 41,9% ten problemas de soño, e un 38,7 % asegura sufrir dores de cabeza, entre outros problemas como taquicardia, mareos ou desmaios. Desde que comezou a pandemia, o 61,2% recoñece que lle preocupa a saúde moito máis que antes e un 48,6% traslada esa preocupación ao temor para contraer unha enfermidade grave.

CONSULTA OS RESULTADOS DO ESTUDO AQUÍ.
Documento de avance de resultados.
Documento de variables sociodemográficas.
Documento de variables socioeconómicas.

Vía El Correo Gallego e Confederación Salud Mental España.
Compartir contido