Durante os vindeiros meses, un total de 21 persoas con dificultade de acceso ao emprego pertencentes ao Programa Incorpora de “la Caixa” recibirán formación específica para capacitarse como conserxes e recepcionistas, aumentando así as súas posibilidades de inserción laboral. As persoas participantes nesta formación pertencen ás entidades Saúde Mental FEAFES Galicia, COGAMI e Igaxes.
O curso, que conta cun total de 300 horas, está xestionado pola federación de saúde mental e desenvolverase en Santiago de Compostela durante os meses de abril, maio, xuño e xullo. O seu obxectivo é capacitar ao alumnado para desempeñar tarefas profesionais como conserxe-recepcionista, realizando para iso labores de atención ao público, servizo de recepción, control de accesos e vixilancia, mantemento correctivo e preventivo de instalacións, etc.
A formación teórica será complementada con 80 horas de prácticas non laborais en empresas colaboradoras, onde o alumnado poderá poñer en práctica as facultades adquiridas e coñecer de primeira man o funcionamento das empresas do sector. Isto tamén permite ao empresariado coñecer como traballan estas persoas de cara á valoración dunha posible contratación posterior.
Ademais deste curso, as accións formativas levadas a cabo no marco do Programa Incorpora contemplan tamén un curso de limpeza de inmobles, cristais e superficies industriais que se impartirá na Coruña a partir de setembro.
Punto Formativo Incorpora
A través deste proxecto, “la Caixa” ten como finalidade a integración sociolaboral de persoas en risco ou situación de vulnerabilidade, buscando a súa capacitación para que estean máis preparadas á hora de inserirse no mundo laboral. Para iso, realízanse cursos que pretenden mellorar a empregabilidade daquelas persoas que se atopan en risco de exclusión social e que non poden acceder a outras accións formativas.
Trátase dunha formación de calidade que non inclúe só os contidos técnicos, senón que tamén forma á persoa dende un punto de vista integral proporcionándolle as ferramentas necesarias para superar outros obstáculos que poidan afectar á súa empregabilidade.
Deste modo, o Punto Formativo Incorpora traballa sobre catro eixes básicos: encaixar a formación á demanda empresarial, empoderar ás persoas usuarias, facilitar prácticas non laborais en empresas ordinarias e traballar en rede con outras entidades.
