A asociación Alba, de Pontevedra, proclamouse gañadora este sábado do VI Campionato de Balompé Todos polo Fútbol, celebrado pola Federación de Asociacións de Familiares e Persoas con Enfermidade Mental de Galicia (Feafes). O segundo posto foi para Lenda, de Redondela e os terceiros clasificados, Morea O Barco e Apem A Coruña.
O campionato tivo lugar no pavillón do Restollal de Santiago de Compostela ao longo de toda a xornada, o sábado 30 de xuño. O obxectivo deste evento é promover o deporte en igualdade, impulsar a práctica de deporte entre as persoas con enfermidade mental e loitar contra o estigma social que padece este colectivo. En total, Feafes Galicia reuniu no pavillón máis de 300 persoas, entre participantes e acompañantes.
Dende o mes de marzo ata mediados de xuño, os 10 equipos que participan na liga enfrontáronse nunha serie de partidos, que agora conclúen nesta final, que se disputa seguindo o modelo dos play-off.
En total, participaron 10 combinados, procedentes de nove asociacións de toda Galicia. Así, Apem envía dous equipos, un da Coruña e outro de Cambre. Ademais, compiten Avelaíña (A Garda e Gondomar), A Mariña (Burela e Ribadeo), Doa (Vigo e Cangas), Lenda (Redondela), Morea (O Barco de Valdeorras), Portanova (Ferrol e Cerdido), Alba (Pontevedra) e Lar (Vilagarcía de Arousa). Esa última entidade foi a gañadora da edición anterior, xunto con Apem como segunda clasificada e Morea como terceira.
