Durante a tarde de onte, a conselleira de Traballo e Benestar, Beatriz Mato, visitou as instalacións nas que FEAFES Galicia desenvolve o seu traballo dende o mes de febreiro. A conselleira estivo acompañada pola Secretaria Xeral de Política Social, Coro Piñeiro, e pola Directora Xeral de Formación e Colocación, Ana Mª Díaz. Beatriz Mato percorreu as oficinas da Federación para ver de primeira man a labor que realizan os distintos traballadores e recibir información sobre os servizos que presta a entidade.
Tras coñecer as instalacións, as tres convidadas reuníronse con distintos representantes de FEAFES Galicia e do movemento asociativo, entre os que se atopaban o Presidente, Xosé Ramón Girón, o Director, Antonio Hernández, un representante do Comité de Persoas con Enfermidade Mental e a Xunta Permanente, formada por membros de distintas asociacións federadas.
O Presidente de FEAFES Galicia expuxo ante a conselleira a situación da entidade e a realidade da enfermidade mental en Galicia, que afecta actualmente a máis de 41.700 persoas. Carlos García, pola súa parte, falou en nome do Comité de Persoas con Enfermidade Mental acerca da realidade deste colectivo, as súas inquedanzas e as súas necesidades.
Ambos incidiron en que as persoas con enfermidade mental constitúen un colectivo que carga con grandes lacras na súa vida diaria: unha concepción negativa e estigmatizada por parte da sociedade, grandes dificultades para a inserción social e laboral e insuficientes recursos na atención á saúde mental. A actual crise económica, ademais, está a afectar moi negativamente ás persoas con enfermidade mental a través dos recortes en programas de acompañamento e integración, impedindo así o retorno de moitas persoas a unha vida activa e satisfactoria.
A conselleira Beatriz Mato felicitou reiteradamente a labor de FEAFES e manifestou o seu orgullo de colaborar con esta entidade. Valorou moi positivamente a creación do Comité de Persoas con Enfermidade Mental considerándoo un avance importante na dotación de voz e de participación ós propios afectados.
Beatriz Mato indicou que, en tempos de recortes como no que nos atopamos, a Consellería de Traballo e Benestar reafirma o seu compromiso coa discapacidade e coa enfermidade mental, especialmente en materia de inserción laboral como ferramenta para a integración real deste colectivo. Así, anunciou que este ano FEAFES Galicia contará cun plan integrado de emprego cunha dotación de 76.500 euros do que se beneficiarán 60 persoas.
