Cinco demandantes de emprego da bolsa de Feafes Galicia están a realizar prácticas non laborais no establecemento de Decathlon en Vigo. Grazas ao Programa Integrado de Emprego están a aprender a realizar as tarefas de vendedor durante a súa estancia dun mes na empresa.
As prácticas comezaron o 2 de maio e finalizan o 31 de mesmo mes. Esta iniciativa é unha oportunidade para que as persoas con enfermidade mental se desenvolvan dentro dun ámbito laboral e poidan demostrar as súas capacidades e habilidades. Así mesmo, é un xeito de colaborar na loita contra o estigma social que ten o colectivo.
Feafes Galicia agradece esta oportunidade e espera seguir colaborando con Decathlon na inserción laboral de persoas con enfermidade mental. Así, confían en que esta experiencia se poida ampliar e que estas prácticas non laborables dean lugar a futuras contratacións.
