O aumento da pobreza e da desigualdade neste ano que remata fai que a presenza destas problemáticas a nivel político e social sexa imprescindible. Por este motivo, as entidades membro de EAPN-Galicia (Rede Galega de Loita contra a Pobreza), entre as que se atopa FEAFES Galicia, lanzamos unha campaña de comunicación unitaria este Nadal.
O obxectivo é trasladar á opinión pública que as persoas en situación de pobreza e exclusión están vendo vulnerados os seus dereitos, pero non por isto deixan de telos. Baixo a etiqueta #Dereitos365, búscase lembrar a necesidade de facerlle fronte á exclusión social diariamente.
A partir do 17 de decembro e durante todas as festas, sucederanse unha serie de mensaxes en blogs, redes sociais e webs de todas as entidades de acción social galegas que apelen á defensa dos dereitos sociais e á loita contra a exclusión a través da implicación de todas e todos. Porque a desigualdade e a exclusión combátense todos os días, #Dereitos365.
EAPN-Galicia e o seu Grupo de Comunicación
EAPN Galicia está integrada por 125 entidades que traballan contra a pobreza e a exclusión en Galicia e ten como misión “defender os dereitos das persoas en situación ou risco de pobreza e exclusión mediante a incidencia política e social”.
O grupo de Comunicación está formado polos responsables de comunicación de entidades como Autismo Galicia, Arela, COGAMI, Down Galicia, Ecos do Sur, FEAFES Galicia, FEGADACE, Fundación Meniños, Fundación Ronsel, Igaxes3 ou Médicos do Mundo. Ademais de organizar accións concertadas de comunicación ou formación, trata de defender a causa e a mensaxe principal da defensa dos dereitos e a dignidade das persoas en risco de pobreza ou exclusión social, moi lonxe de calquera visión asistencialista.
