Saúde Mental FEAFES Galicia pon o foco sobre a relevancia da problemática do suicidio na nosa comunidade.
O 10 de setembro conmemórase o Día Mundial para a Prevención do Suicidio 2024, sendo este, segundo a OMS, un dos problemas mías graves de saúde pública que debe ser atendido de forma prioritaria.
Por iso, desde Saúde Mental FEAFES Galicia, queremos reivindicar unha abordaxe transversal do suicidio para mitigar os seus efectos, sendo preciso traballar na prevención, detección, diagnóstico, tratamento e continuidade de coidados dos problemas de saúde mental, así como unha visibilización axeitada e responsable desta realidade.
Galicia, segunda comunidade coa maior taxa de suicidios
No mundo suicídase unha persoa cada 40 segundos, e en España é a principal causa externa de mortalidade. En Galicia, no ano 2022, morreron por esta causa 340 persoas (235 homes fronte a 105 mulleres), cunha taxa de 12,28 suicidios por cada 100.000 habitantes, fronte ao 7,79% nacional e o 11,93% europeo. A nosa comunidade ocupa o segundo lugar na taxa de suicidios en España tras Asturias, e o quinto en cifras absolutas tras Andalucía, Cataluña, a Comunidade Valenciana e Madrid.
No 2022 houbo en Galicia 9 suicidios máis que no ano anterior, case triplicando as mortes por accidente de tráfico, que se sitúan en 123. En termos absolutos, A Coruña é a provincia que máis suicidios rexistra (155), seguida de Pontevedra (92), Lugo (52) e Ourense (32). En termos relativos, na cabeza atópase Lugo (15,95 suicidios por cada 100.000 habitantes), seguido de A Coruña (13,07), Ourense (10,48) e Pontevedra (10,47).
Un programa para conectar coa vida
O programa “Conecta coa vida”, financiado pola Consellería de Sanidade e desenvolvido por Saúde Mental FEAFES Galicia, busca ofrecer información e asesoramento sobre o suicidio a toda a poboación, partindo da base de que o silencio que rodea ao suicidio produce un aumento do estigma, a desinformación, a incomprensión e dificulta o acceso ás medidas de prevención.
O obxectivo deste programa é realizar accións de sensibilización, prevención, detección precoz, coordinación e intervención dende unha perspectiva integral para previr e atender a conduta suicida, así como realizar accións de postvención en superviventes. Deste xeito, presta especial atención aos colectivos vulnerables ou ás persoas con maior risco de desenvolver unha ideación suicida, especialmente mulleres en situación de violencia, persoas con discapacidade, persoas cun diagnóstico de saúde mental e persoas en risco de exclusión.
No 2023, no marco do programa “Conecta coa vida”, Saúde Mental FEAFES Galicia recibiu 103 consultas sobre suicidio, prestando atención a 68 persoas en risco e a 40 familiares. Para dar resposta ás súas situacións, a federación coordinouse con outras 25 entidades e recursos sociais, impartindo ademais formación e sensibilización sobre o suicidio a 2.131 persoas en centros educativos e a 444 profesionais de dispositivos sociosanitarios.
