Da comezo o programa “Dixitalízate para o emprego” que realizaremos durante o primeiro trimestre do ano grazas ao apoio da Confederación SALUD MENTAL España.
7 persoas cun problema de saúde mental, participarán desde este xaneiro en Santiago no programa “Dixitalízate para o Emprego: Desenvolvemento das habilidades dixitais para a inclusión laboral”.
Esta iniciativa está financiada por la Confederación SALUD MENTAL España dentro da 4ª Convocatoria 2025/2026 da Estratexia da Empregabilidade para o Desenvolvemento de Competencias laborais, sensibilización social e apoio e materia de emprego para as persoas con problemas de saúde mental e/ou discapacidade psicosocial.
Dirixido ás persoas con maiores dificultades para atopar un emprego.
No programa “Dixitalízate para o Emprego”, que durará desde xaneiro ata marzo do 2026, participarán persoas usuarias de Saúde Mental FEAFES Galicia que estean en busca activa de emprego, con pouca ou nula experiencia laboral e que teñan dificultades para buscar un emprego ou para afrontar unha entrevista de traballo. Son tamén, persoas que presentan dificultades para o manexo e uso das ferramentas dixitais no ámbito laboral o que obstaculiza a adquisición e mantemento dun emprego.
Do mesmo xeito, este programa está especialmente dirixido a aquelas persoas usuarias que mostren maiores dificultades para integrarse na comunidade e levar unha vida autónoma. Ademais, priorizarase a inclusión de mulleres vítimas de violencias de xénero con cargas familiares, persoas inmigrantes e persoas con dificultades especiais.
As formacións do programa “Dixitalízate para o emprego” son presenciais, pero facilitarase a asistencia telemática a aquelas participantes con dificultades para o desprazamento. Tamén se facilitarán recursos de conciliación e se outorgarán becas para cubrir os gastos de desprazamento daquelas persoas que o precisen, en liña cos Obxectivos de Desenvolvemento Sostible relacionados cunha educación inclusiva e accesible.
Formacións que melloran as habilidades dixitais para a inclusión laboral.
A través do programa “Dixitalízate para o Emprego”, buscamos mellorar as habilidades e competencias dixitais das persoas con problemas de saúde mental en idade laboral. Queremos favorecer a súa inserción no mercado laboral, potenciar a súa autonomía e promover a súa integración social para así garantir o seu benestar e a igualdade de oportunidades.
A iniciativa, que comeza este mes de xaneiro, constará de 84h de formación nas que se combinan aspectos teóricos e prácticos. O programa formativo está dividido en 10 módulos que abordan aspectos clave do desenvolvemento laboral e persoal:
- Habilidades dixitais para a adquisición e edición de CV e cartas de presentación empregando aplicacións especializadas.
- Busca de empresas para envío de CV no ámbito dixital.
- Busca de información en buscadores de emprego online.
- Competencias dixitais para o uso de plataformas de videochamadas, creación de tarefas, certificado dixital e trámites online.
- Ciberseguridade.
- Dereitos sociais e humanos, ODS, perspectiva de xénero e igualdade.
Ademais, o programa tamén inclúe unha parte práctica e asesoramento personalizado que permitirá ás persoas participantes realizar simulacións de entrevistas laborais, practicar a creación de CVs personalizados, mellorar as habilidades sociais e comunicativas a través de dinámicas de grupo e recibir orientación individualizada sobre o seu desenvolvemento profesional.
Con programas como “Dixitalízate para o emprego”, a nosa entidade continúa traballando para garantir a inclusión social e laboral das persoas cun problema de saúde mental, proporcionando oportunidades que favorezan a súa integración, autonomía e benestar.
Coa colaboración da:
O proxecto “Dixitalízate para o emprego: desenvolvemento de habilidades dixitais para a inclusión laboral”, foi financiado pola Confederación SAÚDE MENTAL España dentro da 4ª Convocatoria 2025/2026 da Estratexia da Empregabilidade para o Desenvolvemento de Competencias laborais, sensibilización social e apoio e materia de emprego para as persoas con problemas de saúde metnal e/ou discapacidade psicosocial.
