A Federación de Asociacións de Familiares e Persoas con Enfermidade Mental de Galicia (Feafes) celebra este sábado a final do VI Campionato de Balompé Todos polo Fútbol, un encontro deportivo no que participan equipos de nove asociacións de toda a comunidade autónoma.
O campionato terá lugar no pavillón do Restollal de Santiago de Compostela a partir das 11 da mañá e, ao longo de toda a xornada, disputaranse varios partidos ata a entrega de premios, prevista para ás 20.10 horas.
O obxectivo deste evento é promover o deporte en igualdade, impulsar a práctica de deporte entre as persoas con enfermidade mental e loitar contra o estigma social que padece este colectivo. En total, Feafes Galicia agarda reunir no pavillón a máis de 300 persoas, entre participantes e acompañantes.
Dende o mes de marzo ata mediados de xuño, os 10 equipos que participan na liga enfrontáronse nunha serie de partidos, que agora conclúen nesta final, que se disputa seguindo o modelo dos play-off, con encontros de 30 minutos de duración. Así, a partir das 11 horas haberá dous partidos eliminatorios previos, nos que xogarán os equipos que conseguiron menos punto ao longo da tempada.
A continuación, celébranse os encontros de cuartos de final, que se prolongarán ata á tarde e, a partir das 17,30 horas, xogaranse as semifinais. A final do campeonato está prevista para as 19,20 horas, co obxectivo de realizar a entrega de premios sobre as 20.10 horas.
En total, participan 10 combinados, procedentes de nove asociacións de toda Galicia. Así, Apem envía dous equipos, un da Coruña e outro de Cambre. Ademais, compiten Avelaíña (A Guarda e Gondomar), A Mariña (Burela e Ribadeo), Doa (Vigo e Cangas), Lenda (Redondela), Morea (O Barco de Valdeorras), Portanova (Ferrol e Cerdido), Alba (Pontevedra) e Lar (Vilagarcía de Arousa). Esa última entidade foi a gañadora da edición anterior, xunto con Apem como segunda clasificada e Morea como terceira.
Esta actividade, organizada polo departamento de Ocio e Deportes de Feafes Galicia, ten como obxectivo amosar á sociedade a imaxe máis positiva do colectivo de persoas con enfermidade mental, loitando de modo activo contra os estereotipos e o estigma social. As actividades organizadas polo servizo de Ocio de Deportes tamén permiten mellorar a calidade de vida das persoas con enfermidade mental e das súas familias. Así, os participantes nas actividades rompen coa rutina diaria, realizan actividade física desde unha perspectiva lúdica, enriquécense culturalmente, socializan e intégranse na sociedade. Á súa vez, permite un respiro aos familiares na súa tarefa de coidadores.
Por outra banda, Feafes Galicia quere amosar o seu agradecemento a aqueles organismos e empresas que colaboran e fan posible a celebración deste campionato. Entre eles está o concello de Santiago de Compostela, que cede as instalacións que acollen o evento. Ademáis, as firmas Coca-Cola, Coren, Gadis e a Fundación Celta de Vigo fixeron unha donación dos seus produtos.
