Skip to main content
Onte, Obra Social “la Caixa” fixo entrega dos Premios Incorpora Galicia nun acto organizado no Museo do Marco de Vigo. Estes galardóns van dirixidos a empresas galegas que apostan pola integración laboral de colectivos vulnerables na comunidade galega.
A empresa viguesa Marodri, o centro de día Anduriña, a empresa Urbaser e o programa de radio Convivir en Igualdade foron os galardoados. O xurado tivo en conta o número de contratacións de persoas en risco de exclusión social respecto do persoal total, o perfil dos traballadores integrados e tamén a duración dos contratos.
Os encargados de entregar os galardóns dos Premios Incorpora nesta sétima edición foron o director territorial de CaixaBank, Marc Benhamou; o director da área Social da Fundación A Caixa, Marc Simón; e o presidente de IGAXES3, entidade coordinadora do grupo Incorpora, Luís Barreiro.
A empresa Marodri, que facilita servizos de limpeza, rehabilitación e restauración, foi galardoada non só porque a súa principal fonte de contratación é este programa, senón porque ademais ofrece formación a colectivos en risco de exclusión e “esfórzase na difusión do programa que a empresa realiza”.
O centro Anduriña recibiu o galardón dentro da categoría de pequena empresa. Dedicada a servizos sociosanitarios para a terceira idade, atende a 10.000 persoas maiores de 60 anos, especialmente na zona do Morrazo. O xurado tivo en conta que un gran número dos seus empregados sae do programa Incorpora: “O Centro de Día Anduriña ten no seu ADN a colaboración con entidades sen ánimo de lucro e a inserción de colectivos en risco de exclusión”.
Urbaser foi a terceira empresa protagonista da noite. O xurado resaltou “o esforzo por xerar emprego ben remunerado, seguro e baseado na igualdade de oportunidades”. Dedicada ao sector limpeza, Urbaser realizou un esforzo de integración con “un colectivo de moi difícil inserción” como son as persoas con enfermidade mental.
O programa de Radio Galega Convivir en Igualdade, que conduce Clara de Saá, foi merecedor do premio especial. “Durante anos difundíronse cada unha das actividades que se quixeron divulgar, logrando sempre un tratamento adecuado e diferenciador mediante reportaxes amplas ou entrevistas en profundidade”, destaca nunha nota a organización.
Incorpora facilitou 582 postos de traballo en Galicia entre xaneiro e outubro deste ano, 192 máis que no mesmo período do ano pasado. Atende a colectivos desfavorecidos, como persoas con discapacidade, inmigrantes, ex reclusos, parados de longa duración, mulleres vítimas de violencia doméstica e mozos en situación de vulnerabilidade.