O risco que ten unha muller con problemas de saúde mental de sufrir violencia na parella multiplícase entre 2 e 4 veces respecto ás mulleres en xeral. A evidencia está en que o 80% das mulleres con problemas de saúde mental que vive en parella sufriu algún tipo de violencia por parte de dita parella, máis da metade sufriu violencia física e máis do 40% foi vítima de violencia sexual ao longo da súa vida. Concretamente, a infancia é a etapa máis vulnerable. Neste período, a porcentaxe de abuso sexual neste colectivo é moi elevado, xa que alcanza ao 26%. Cando se dan estas violencias, o 42% recoñece non identificalas como tales e, ás que si as recoñecen e denúncianas, non se lles dá credibilidade debido ao seu trastorno mental.
Fronte a estes datos, e con motivo do Día Internacional da Eliminación da Violencia contra a Muller, o 25 de novembro, a Confederación SALUD MENTAL ESPAÑA regresa coa campaña #NosotrasSíContamos, que xa se iniciou o ano pasado, e cuxo obxectivo é visibilizar a violencia e os abusos especialmente graves que sofren as mulleres con problemas de saúde mental.
Nesta ocasión, e baixo o lema “A saúde mental non se golpea”, a campaña busca sensibilizar e denunciar, a través de experiencias persoais, como a violencia machista afecta á saúde mental das mulleres, pero á vez, como os problemas de saúde mental constitúen un factor multiplicador de risco de sufrir violencia, abusos e vulneración de dereitos.
Nun vídeo, tres mulleres con problemas de saúde mental, pertencentes ao movemento asociativo de SALUD MENTAL ESPAÑA, comparten de forma intimista e persoal como a violencia machista golpeoulles en distintas facetas e etapas das súas vidas. Cos seus testemuños, denuncian a discriminación constante e a vulneración de dereitos que sofren, tan básicos como o de poder exercer a maternidade, e que atenta claramente contra os dereitos humanos e a Convención Internacional sobre os Dereitos das Persoas con Discapacidade.
“É moi difícil para unha muller con problemas de saúde mental quedar coa custodia dos fillos. E diso aprovéitanse moitos maltratadores”, evidencia no vídeo Lurdes Da Costa Lourenço, quen ademais reprocha que “en moitas casas de acollida non aceptan ás mulleres con problemas de saúde mental”, quedando nunha situación de especial vulnerabilidade e desprotección. “Hai que cambiar a política e que nos teñan máis en conta”, reclama Lurdes.
Nesta campaña, as mulleres tamén recriminan aos maltratadores “o dano que lles fixeron”, lembrándolles “que non se nos borrará na vida. E que non hai xustiza no mundo para pagar o dano que fan”, sentenza Lurdes.
Por último, as protagonistas buscaron cos seus testemuños servir de referencia para calquera muller na súa mesma situación, trasladando unha mensaxe de forza e determinación, e animándoas a denunciar “e por moito que che diga, quítame a denuncia ou se non che mato, non quitarlla e seguir para adiante”, sentenza Loli Romero Martínez.
“A unha muller que sufriu violencia diríalle que non está soa, que hai moitas persoas que a poden axudar e apoiar, tanto profesionais como mulleres que pasaron pola súa mesma situación”, conclúe Mª Isabel García Pena, unha das protagonistas da campaña.
Rede Estatal de Mulleres SALUD MENTAL ESPAÑA
Lurdes, Loli e Mª Isabel forman parte da Rede Estatal de Mulleres SALUD MENTAL ESPAÑA, que xorde como plataforma de actuación das mulleres con experiencia propia en dificultades en saúde mental, para expresar as súas reivindicacións e traballar por elas.
Integrada por 25 mulleres, representantes das entidades de todos os territorios pertencentes ao movemento asociativo da Confederación SALUD MENTAL ESPAÑA, a Rede naceu a mediados de 2018 despois de varios talleres e un intenso traballo de recompilación, posta en común e consenso ao redor da información, as experiencias e as necesidades compartidas por todas as participantes.
Recoñecen neste espazo un lugar seguro, de respecto e sensibilidade, no que as súas integrantes teñen a oportunidade de compartir experiencias persoais e sentirse comprendidas e apoiadas.
