As instalacións de Always TM (Estrada de Redondela, 42) foi, este venres, escenario do XII Campionato de Tenis de Mesa para as persoas con problemas de saúde mental. Un encontro lúdico e deportivo no que participaron seis asociacións procedentes de toda a comunidade autónoma.
O torneo comezou ás 10h e rematou ás 14h aproximadamente. Durante este tempo, desenvolvéronse unha serie de partidos individuais nos que se enfrontaron 42 participantes. Tras a celebración do campionato procedeuse a entrega de premios e, posteriormente, celebrouse un xantar de convivencia.
As persoas participantes do torneo proveñen de distintos puntos da xeografía galega e pertencen a seis asociacións e delegacións de Saúde Mental FEAFES Galicia: Saúde Mental FEAFES Galicia (Vigo), Saúde Mental Ferrol (Narón), Andaina (Dodro e Ordes), Lenda (Redondela), Avelaíña(A Guarda, Baiona, Ponteareas) e Doa (Vigo e Cangas).
O Campionato de Tenis de Mesa ten como obxectivo promover o deporte en igualdade, impulsar a actividade física entre as persoas con problemas de saúde mental e loitar contra o estigma social que sofre este colectivo. A través deste torneo, Saúde Mental FEAFES Galicia amosa á sociedade unha imaxe
normalizada da saúde mental, combatendo de modo activo os estereotipos negativos e os falsos prexuízos que se asocian a estas persoas.
As actividades de ocio e deportes que organiza Saúde Mental FEAFES Galicia axudan a mellorar a calidade de vida das persoas con problemas de saúde mental e das súas familias, pois as persoas participantes rompen coa rutina diaria, realizan actividade física dende unha perspectiva lúdica, enriquécense culturalmente, socializan
e intégranse na sociedade. Á súa vez, permiten un respiro ás familias na súa tarefa de coidados.
