Skip to main content
Novas

O Proxecto Nise celebra Obradoiros de Conduta Suicida nas principais cidades galegas

By 1 de Marzo de 2012Novembro 13th, 2022No Comments

As sete cidades galegas acollerán ao longo dos meses de marzo e abril diferentes Obradoiros de Conduta Suicida, unha iniciativa que se encadra dentro do Proxecto Nise e que esta organizada pola Consellería de Sanidade, a Escola Galega de Saúde para Cidadáns e Feafes Galicia.

Esta actividade formativa está dirixida a persoas con enfermidade mental, familiares, coidadores e á cidadanía en xeral. O primeiro taller celebrarase o 13 de marzo en Ourense e repetirase o día 20 en Ferrol, o 26 e A Coruña e o 29 en Lugo. A continuación, o 11 de abril levaranse a cabo os obradoiros de Santiago e Vigo. Finalmente, o 17 de abril impartirase a actividade en Pontevedra.

Os talleres celebraranse en horario de 16.30 a 19.30 horas en todas as cidades. Para máis información e para inscribirse nos obradoiros débese consultar a web www.sergas.es/escolasaude ou enviar un email a escola.saude@sergas.es. Tamén se pode contactar con Feafes Galicia a través do teléfono 981 554 395.

O obxectivo destes talleres é informar sobre os mitos e realidades do suicidio e eliminar o estigma asociado a estas condutas. Ademais, inténtase proporcionar aos coidadores, familiares, pacientes e á cidadanía en xeral as habilidades e coñecementos necesarios para recoñecer os sinais de alerta e manexar a situación.

Así, ao longo das tres horas de duración do obradoiro, os expertos explicarán os mitos e ideas erróneas sobre o suicidio, os sinais de alerta e os elementos que poden precipitar a conduta suicida. Ademais, indicarán que se debe facer ante unha persoa con posible conduta suicida e ante aqueles que sufriron o suicidio dun achegado