Segundo os datos da Memoria 2020 do Instituto de Medicina Legal de Galicia (Imelga), foron un total de 307 as mortes por suicidio que se produciron en Galicia o ano pasado, sendo a segunda comunidade autónoma con maior taxa de suicidios despois de Asturias. A Coruña é a provincia que máis suicidios rexistra cunha cifra de 135 mortes.
Vimos de conmemorar o Día Mundial da Saúde Mental, e a asociación Andaina incide na necesidade de abordar esta problemática de xeito integral comezando pola sensibilización da comunidade para dotala de información e ferramentas coas que abordar a conduta suicida.
Tal e como afirma a asociación, o que se sabe do suicidio ata agora permite anticiparse, permite que profesionais, familiares e outras persoas próximas poidan detectar as sinais de alarma e prestar axuda á persoa en situación de risco. Máis para isto, é preciso que a problemática do suicidio sexa un debate aberto na sociedade, que exista compromiso político por abordalo e que se traduza en recursos e orzamento. Falar de suicidio axuda a previlo.
En consonancia coa problemática detectada, Andaina comezou a traballar na prevención do suicidio cun programa piloto no ano 2020 na comarca de Ordes, que ten continuidade neste 2021 a través do Programa integral para a mellora na detección e intervención en risco de suicidio nas comarcas rurais de Ordes e Ulla-Sar.
Con este programa preténdese contribuír á redución da incidencia do suicidio nas comarcas nomeadas a través de tres liñas de actuación: información e sensibilización social, intervención con persoas e grupos vulnerables e formación a profesionais do ámbito sociosanitario. Ao abeiro deste programa, elabóranse diferentes materiais de apoio e realízanse sesións formativas e charlas.
Andaina ponse a disposición daquelas persoas que poidan precisar información e apoio en relación á conduta suicida, podendo contactar no 981 076 405 ou en andainapsm@gmail.com.
