Un total de 21 usuarios do Servizo de Orientación Laboral de Feafes Galicia inician o “Taller de Búsqueda Activa de Emprego: Constrúe o teu camiño cara ao emprego. ” A formación está organizada por FSC Inserta e impártese entre o 1 e o 14 de agosto en horario de 10 a 13 horas. En Santiago de Compostela, con 11 alumnos, ten lugar na sede da Escola Galega de Administración Pública (EGAP); e en Lugo, con 10 alumnos, no Espazo Lab.
O curso ten unha duración de 30 horas e impártense os seguintes módulos: “Mercado laboral e autocoñecemento”, “Saca partido ao teu curriculum vitae”, “Proceso de selección e entrevista” e “Emprego 2.0”.
En Feafes Galicia ofrecemos información, asesoramento e apoio á inserción laboral traballando como centro colaborador do Servizo Público de Emprego de Galicia desde 2002. Para iso, contamos co Observatorio de Emprego para Persoas con Enfermidade Mental (OEDEM), que ten como misión facilitar a inserción laboral a través de accións de información, orientación, cursos de formación, prospección e intermediación laboral coas empresas e apoio para a consecución e o mantemento do posto de traballo.
