29/08/2018.

Internos de A Lama peregrinan a Compostela con Lenda

Un grupo de internos do Centro Penal de A Lama iniciaron o pasado luns o tramo da ruta portuguesa do Camiño de Santiago que discorre entre Pontevedra e Compostela. Partiron da cidade do Lérez e hoxe, mércores, chegan a Compostela e asistirán á misa do Peregrino que se celebra ao mediodía na catedral.

Os reclusos estiveron acompañados por profesionais do programa PAIEM para a atención de internos con problemas de saúde mental, o cal é levado a cabo pola asociación Lenda no Centro Penal de A Lama desde o ano 2009 co obxectivo de mellorar a calidade de vida e a reinserción social destas persoas. 

Esta saída pretende fomentar a cohesión grupal dos internos e a súa relación cos terapeutas do centro fóra do contexto penal, promover a súa saúde mental, reforzar a súa adaptación social e dotar de sentido a todo o seu proceso rehabilitador. 

Programa  PAIEM

O Programa para a Atención Integral a Persoas con Enfermidade Mental en Centros Penais (PAIEM) consiste nun traballo de intervención con persoas con problemas de saúde mental grave e crónica recluídas nos centros penais galegos. Lévase a cabo a través dun convenio de colaboración entre Saúde Mental FEAFES Galicia, a Fundación Barrié e a Secretaría Xeral de Institucións do Ministerio de Interior. 

Actualmente, o programa PAIEM aplícase nos cinco centros penais de Galicia a través das asociacións Alume (Bonxe e Monterroso), Morea (Pereiro de Aguiar), Lenda (A Lama e CIS Carmen Avendaño) e APEM (Teixeiro e CIS Carmela Arias). Para iso, os técnicos das asociacións traballan coordinadamente cos funcionarios e profesionais dos centros penais.

O seu obxectivo é conseguir que as persoas internas con problemas de saúde mental coñezan e aprendan a manexar a súa patoloxía, evitando recaídas e favorecendo á vez a participación nos programas e recursos do centro. O último ano, neste programa participaron 166 persoas con enfermidade mental grave e persistente, atendéronse a 22 familias e foron formados 44 funcionarios.


Compartir contido