Fai un par de anos, un grupo de prestixiosos alpinistas liderados por Sebastián Álvaro, creador do programa “Al filo de lo imposible”, tomaron o reto de demostrar que se a un grupo de persoas con esquizofrenia expónselles un reto que lles ilusiona, adéstraselles e se lles acompaña, son capaces de conseguilo.
O reto que lles expuxo foi escalar o Naranjo de Bulnes, unha montaña emblemática do alpinismo español, que é o paradigma da inaccesibilidade. Unha montaña que ten unha parede vertical de 500 metros e que só se pode subir co propio esforzo de cada un. A priori, un reto imposible.
Todo este proceso foi gravado para a creación do documental “Di_capacitados: e se che dixesen que podes?”, que foi impulsado por Janssen en colaboración coa asociación AVIFES e realizada por Javier Álvaro de Salomba Ventures.
Este luns 16 de abril, a asociación APEM organiza no Centro Cívico de Los Mallos, na Coruña, un acto ás 18h no que se dará a coñecer todo o proceso deste proxecto narrado polo propio Sebastián Álvaro e acompañado polas imaxes do documental, do mesmo xeito que se poderá coñecer en directo a algunhas das persoas con esquizofrenia que participaron no reto. O mesmo acto tenrá lugar tamén en Vigo da man de Doa o 17 de abril ás 13h no salón de actos do Hospital Álvaro Cunqueiro.
O obxectivo destas xornadas é poñer en valor a importancia que ten traballar centrados no proxecto de vida das persoas con problemas de saúde mental, así como establecer un novo paradigma onde o asistencial e o social se aliñen para acompañar e axudar ás persoas a conseguir os seus proxectos e, finalmente, demostrar que crendo neles e acompañándoos, é posible que alcancen o obxectivo que se propoñan.
