Do 17 ó 21 de novembro, un grupo de trece profesionais búlgaros pertencentes a entidades e organismos relacionados coa discapacidade e o emprego, visitarán diversos lugares de Galicia para coñecer o traballo que se realiza aquí nesta materia. Trátase dunha actividade que forma parte do proxecto “Emprego protexido: experiencia, innovacións e oportunidades” no que participan a Unión Europea, o Fondo Social Europeo e a Consellería de Traballo e Benestar da Xunta de Galicia.
FEAFES Galicia e a asociación coruñesa APEM foron unhas das entidades visitadas por esta delegación búlgara, que mantiveron un encontro con representantes e profesionais das nosas entidades para coñecer o traballo que realiamos en materia de saúde mental. O encontro, que tivo lugar o mércores 19 de novembro ás 11:00, incluíu unha visita ó Centro de Rehabilitación Social de APEM na Coruña, ó seu Taller de Rehabilitación Laboral tamén na Coruña e ó Centro de Emprego Social en Arteixo.
Ó longo da súa estancia en Galicia, a delegación búlgara de expertos en emprego protexido visitará outros organismos pertencentes a distintos niveis e áreas relacionadas coa discapacidade. Estas visitas incluirán o achegamento a administracións, organizacións sen ánimo de lucro e iniciativas empresariais privadas, podendo coñecer tamén posibilidades de financiamento para estas entidades, exemplos de entidades que participan en proxectos europeos e mecanismos de avaliación e valoración sobre o traballo con persoas con discapacidade.
O obxectivo desta visita é intercambiar experiencias relacionadas coa inserción laboral de persoas con discapacidade para que as dúas partes participantes poidan enriquecerse co coñecemento de prácticas que se realizan noutros países.
